همراه و همگام با معلم در کلاس درس ریاضی

نوروز عادتلري

هر خالقين حياتيندا‏، معيشتينده چوخلو بايرام‏لار اولسا‏دا‏، اونلاردان بيري داها مشهور‏، داها سئويملي اولور‏. آذربايجان خالقيندا ائله‏ليكله كئچيرديگي بئله بير بايرام، نوروز بايرامي‏دير‏.
گونش دونيانين جنوب ياريم كوره‏سيندن قوزئي ياريم كوره‏سينه كئچديگي واخت گئجه‏ايله گوندوز برابرلشير‏… بو واخت قيش قورتارير‏، ياز فصلي باشلايير‏. ائله نوروز بايرامي‏دا بو گونده كئچيريلير‏. دئمه‏لي‏، نوروز بايرامي اصلينده يازين‏، باهارين ايلك گونو‏، طبيعتين جانلانماسي‏، توپراغين اويانماسي بايرامي‏دير‏. آداملار نوروز بايرامي‏نين قاباغينا چيخارلار :
نوروز‏، نوروز باهارا‏،
گوللر‏، گوللر نوبارا‏،
باغچاميزدا گول اولسون‏،
گول اولسون بولبول اولسون‏،
باهار گلدي‏، باهار گلدي‏، خوش گلدي‏،
خسته كؤنول اونو گؤرجك ديرچلدي‏.
اكينچي محصول اكه‏جگي توپراغين شومونا باشلايير‏. باغبان مئيوه آغاجلارين قورو بوداغلاريني كسيب آتير‏. اوشاقلار نوروز گولو‏، قار‏چيچگي اوچون مئشه‏لره‏، چؤللره اوز توتارلار‏.
ائل‏–‏اوبادا‏، هر عاييله‏ده نوروز بايرامينين گلمه‏سينه آزي بير آي قالميش حاضيرليق ايشلري آپاريلير‏. ائولر آغارديلير‏، پالتار‏–‏پالاز‏، قاب‏–‏قاجاق يويولور‏. حيط‏–‏باجا سوپورولوب تميزلنير‏. هامي اوچون تزه پالتار تيكيلمه‏گه جهد گؤستريلير‏.

نوروز بايرامي‏نين چرشنبه‏لرينده حيط لرده تونقال يانديريلير‏. تونقالين اوستوندن هوپپانيب كؤهنه ايلين آزار –‏بئزاري‏دا يانديريلير‏. اودون اوستوندن هوپپانانلار نغمه‏لرده اوخويورلار‏.
آغيرليغيم‏–‏اوغورلوغوم اودلارا‏،
يازدا منله هوپپانمايان يادلارا‏.
ياخود‏:
آغريم‏–‏اوغروم تؤكولسون‏،
اودا دوشوب كول اولسون‏.
يانسين آلوو ساچيلسين‏،
منيم بختيم آچيلسين‏.
نوروز بايراميندا قولاق فالينا چيخماق عادتي‏ده واردير‏. قارانليق دوشنده نيت توتوب قونشولارين دانيشيقلارينا قولاق آسماغا گئدرلر‏. ايلك ائشيديلن سؤز توتولموش نيته اويغون اولاراق يوزولور‏.
اودور‏كي‏، نوروز بايرامي آخشاميندا ائولرده كؤنول آچان‏، اوميد وئرن صؤحبت‏لر دانيشيلمالي‏دير‏. نوروز بايراميندا ان چوخ ياييلميش عادتلردن بيري‏ده قورشاق ساللاماق دير‏. داها چوخ اوشاقلار‏، جاوانلار قارانليق دوشنده ائودن ائوه گزيب باجادان‏، پنجره‏دن قورشاق ساللاييب بايرام پايي آليرلار‏.
اونلارين قورشاقلارينا قوورقا‏، بويانميش يومورتا‏، آلما‏، آرمود‏، اريك‏، قاوالي قوروسو‏،
چئشيدلي شيرنياتلار باغلاييرلار‏. آذربايجانين بؤيوك شاعيري شهريار‏دا «‏حيدر بابايا سلام‏» اثرينده بو قورشاق ساللامادان دانيشيب :
بايرام ايدي گئجه قوشو اوخوردو‏،
آداخلي قيز بي جورابين توخوردو‏،
هر كس شالين بير باجادان سوخوردو‏،
آي نه گؤزل قايدادي شال ساللاماق‏،
بي شالينا بايرامليغين باغلاماق !
شال ايسته‏ديم منده ائوده آغلاديم‏،
بير شال آليب تئز بئليمه باغلاديم‏،
قولام گيله قاچيب شالي ساللاديم‏،
فاطما خالا منه جوراب باغلادي‏،
خان‏ننه‏مي يادا ساليب آغلادي‏!
نوروز بايرامي سوفره‏سينه چئشيدلي خؤركلر‏، چه‏رز‏، شيرنيات دوزورلر‏. سمني‏، گول چيچك‏، گوزگو‏، سو‏، قيزيل اشيالار قويولور‏. ائوده‏كي‏لرين هر بيرينين آدينا شام يانديريلير‏.
ايناما گؤره‏، نوروز بايرامي آخشاميندا هر كس گرك اؤز ائوينده اولسون‏. بير‏ده هامي درد‏–‏قمي اونودوب شن اووقاتلي اولمالي‏دير‏. اوندا بوتون ايل آدام اوچون ائله بؤيله كئچر‏.
نوروز بايرامي گونونده آداملار تازا پالتارلاريني گئييب بير‏–‏بيرينين ائوينه بايرام تبريكينه گئدر‏، هديه‏لر آپارارلار‏. بايراملاشماغا گلن‏لر اوچون سوفره‏يه نوروز موناسيبت‏ايله بيشيريلميش شكربورا‏، پاخلاوا‏، قوغال بيرده باشقا شيرنياتلار‏، چه‏رزلر دوزولور‏. نوروز بايراميندا كين‏–‏كودورت اونودولمالي‏دير‏. هئچ كس گرك بير‏–‏بيري ايله كوسولو قالماسين‏.
نوروز بايرامي ياددا بوللوق‏، خيرخواهليق‏، گؤزلليك بايرامي‏كيمي قالير‏